" إبهـــام النــدم "

تبـددي في كل مسمع ولمـي = قول الرجال الفاهمة لا تعشمت
على هبوب الريب شفته يومّي = غصن الظنون السيئة لين نظمت
بيتـــين للي جــوهـم مـد لهـمي = ســود النــوايا منهــم كم تعلمـت
يا محترم ما شفت وشلون اسمّي = مثلك لئيم وأقول له لو تكرمت
الرمية اللي جات بأطراف كمّي = منها عساني كان أبا طيح ، لا قمت
قالوا دلابك ..قلت من دون جمّي = دلو المذمة مدح مع من تخاصمت
ويوم أصبحت ما بين مدحي وذمي = وش ينفع المذموم لا خيم الصمت
يا من غرست رمــاح عينك بفمي = لا تعتقــد لا طال صمتي تلعثمت
الله وكيــلك كل خــوفي وهمي = من عضـة إبهام الندم لا تكلمت
سُمي قصيدي وان تجرعت سمي = يمسني حش العـراقيب لا قمـت
قل لي إذا أنا أجحفت حق ابن عمي = وش استفـيد أن كان باكـر تنـــدمت
لا صـرت غــارق بين همي وغمي = من يستطــيع يلمـني لا تحطمـت
الله يلعـــن حـــربة مـا تـــــــدمي = كتف الحميا دخنت يأهل الشمت
هذا عصب راسي ولحمي ودمي = باكـر يحـس بلوعتي لا تألمـــت
ثم يعني ويسـوق الأعـذار يمي = وان ما عنا ليّ جيت يمه وسلمت