لاشك قلبي مودعه بيت نمله

لا والله إلاّ شدّوا البدو نجاع = كلٍ هدم مبناه وارتد زمله
شدّ الشديد وقربوا كل مطواع = وراعي المودة فرّق البين شمله
غدا لهم دون الرفيعة تمزّاع = كل بغا درب ٍ عزل وانقسم له
وابكرتاه اللي غدت بين الاقطاع = وآبعد دورتها على اللي جهم له
الهقوة إنه يم "دخنه" بالأوقاع = والا مع اللي سنّدوا مستهم له
لاهيب لاحاشي ولاهيب مرجاع = عفراً فتاه وراعيه ماوسم له
ياغصن موزٍ ناعمٍ له تمر ياع = ومنين ماهبّ الهوى مال حمله
راعي هدب عين مظاليل ووساع = خرس ٍ عيونه والمحاجير جمله
وراعي مجاديلٍ مشطهن يجي باع = أشقر على هاك الردايف يعمله
عليه ماوقفت عيوني بالأدماع = وهجس إن يلحقني على الطول سمله
أعوي عوي ذيبٍ ورا البدو نجاع = يقنب إلين الله يجيب اللحم له
حبه يخج القلب .. مايوجع أوجاع = لاشك قلبي مودعه بيت نمله