" الجو المغيم " للشاعر زيد بن راجح البقمي

ويش أخيل فيك يا الجـو المغيّـم = لا رعود ولا بـروق ولا سحابـه
كل ما شفت الغمامـه قلـت ديّـم = والمطر والبرق ياتي في عقابـه
والهموم اللي على صدري تليّـم = كنها تاجد سعـه فيـه ورحابـه
القمر غاب وظـلام الليـل خيّـم = كيف اسوي قبل يرجع من غيابـه
ما اطول الغربه على قلـب المتيّـم = يحسب الأيـام ويضيـع حسابـه
بس لو عيني عن الدمعه تشيّـم = دمعة الرجال تنقص في المهابـه
ما ينـزل دمعتـه مثـل اليتيّـم = والقوي لو يطلب الدمعـه تهابـه
وان صبرت وشفت صبرك ما يقيّم = ارم مفتاح العذاب وصـك بابـه